Shampiyona ya 2025-26 ikomeje gutanga ishusho idasanzwe ku makipe akomeye mu Rwanda, aho APR FC imaze imikino itanu idatsinda Police FC, ibintu bitari bisanzwe mu mateka y’aya makipe yombi.
Si ibyo gusa, kuko APR FC imaze imikino ine itabona intsinzi muri shampiyona, ikaba imaze gutakaza amanota icyenda y’ingenzi mu rugamba rwo guhatanira igikombe. Abasesenguzi ba ruhago bavuga ko uyu musaruro ushobora kugira ingaruka ku cyizere cy’abakinnyi ndetse no ku mwuka w’ikipe muri rusange.
Ku rundi ruhande, Police FC na yo ntiyorohewe, kuko imaze imikino itatu idatsinda, ikaba imaze gutakaza amanota umunani. Ibi byerekana ko aya makipe yombi ari guhangana n’ibihe bigoye mu ntangiriro z’uyu mwaka w’imikino.
Abakurikiranira hafi ruhago y’u Rwanda bagaragaza ko APR FC isa n’iyatakaje igitinyiro yari ifite, cyane cyane ku bijyanye no kurinda ibitego. Mu mikino iheruka, iyi kipe yagiye itsinda ariko ntibashe kurinda ibitego byayo, bigatuma itakaza amanota ku munota wa nyuma.
Gusa bamwe mu bafana bayo bavuga ko hakiri kare ngo hemezwe ko igitinyiro cyatakaye burundu, kuko shampiyona ikiri ndende kandi amahirwe yo kwisubiraho ahari.
Mu byumweru biri imbere, amaso yose azaba ahanzwe kuri APR FC na Police FC, harebwa niba zishobora kwikosora no gusubira mu murongo mwiza, cyangwa niba ibibazo biri kugaragara byazakomeza kubakurikirana.