Mu gihe ingendo zo ku isi zikomeje kwiyongera, BBC Travel yagaragaje ahantu 10 heza ho gusura mu 2026, hatoranyijwe hashingiwe ku burambe bwihariye, kubungabunga ibidukikije no guteza imbere imibereho y’abaturage bahatuye.
1. Abu Dhabi
Ku isonga hari Abu Dhabi muri Leta Zunze Ubumwe z’Abarabu, umujyi uri kwihutisha iterambere ry’umuco n’ubuhanzi. Iyugururwa ry’ingoro ndangamurage nshya zirimo Zayed National Museum n’izibanda ku mateka n’ubuhanzi bugezweho, biri gutuma uyu mujyi uba igicumbi cy’umuco ku rwego mpuzamahanga.
2. Algeria
Nayo iri mu byashimishije BBC, kubera gufungura amarembo ku bukerarugendo mpuzamahanga. Amatongo y’Abaromani ya Timgad na Djémila, ubutayu bwa Sahara n’imijyi ya kera nka Algiers, bituma iki gihugu kiba ahantu hihariye hatarimo umubyigano w’abakerarugendo.
3. Colchagua Valley
Muri Amerika y’Epfo, Colchagua Valley muri Chili ni ho umuco wa divayi n’ubukerarugendo bwo mu cyaro bihurira. Aha hantu hazwi ku divayi zo ku rwego rw’isi, ibikorwa by’umuco w’aborozi ndetse no kwitegereza inyenyeri zo mu kirere.
4. Cook Islands
Ku ruhande rw’ibirwa, Cook Islands igaragara nk’ahantu heza ku bashaka ituze n’ubunararibonye bwa Polynesia nyakuri. Ubu bukerarugendo bwaho bwibanda ku kurengera inyanja n’ibidukikije, bikarinda umuco n’ubuzima bw’abaturage baho.
5. Costa Rica
Ikomeje kuba icyitegererezo ku isi mu kubungabunga ibidukikije. Amashyamba, inyanja n’inyamaswa zidasanzwe bituma iki gihugu gito kiba kimwe mu bifite ubuzima kamere bwinshi ku isi, mu gihe ibikorwa by’ubukerarugendo bigira uruhare mu kubirinda.
6. Hebrides
Mu Burayi, Hebrides zo muri Scotland zikurura abashyitsi binyuze mu birwa byazo byiza, amateka ya kera, umuco wa whisky n’imiryango yakira neza abashyitsi.
7. Ishikawa
Muri Japon na yo yagarutsweho cyane, aho abashyitsi bashishikarizwa gusura no gufasha mu kwiyubaka nyuma y’umutingito wabaye mu 2024, binyuze mu gushyigikira ubukorikori, amahoteli mato n’imiryango yaho.
8. Komodo Islands
Ku mugabane wa Aziya y’Epfo, Komodo Islands muri Indonesia ni ahantu hihariye ho kubona inyamaswa zidasanzwe za Komodo, mu gihe leta yashyizeho ingamba zo kurinda ibidukikije no kugenzura umubare w’abasura.
9. Montenegro
Igihugu gito cyo ku Mugabane w’u Burayi, gikomeje gukurura abakerarugendo bashaka imisozi, inyanja n’amateka atarimo umubyigano w’ahandi haturanye.
10. Uruguay
Mu gusoza, Uruguay yashimwe nk’igihugu gitekanye, kirengera ibidukikije kandi gifite umuco ukungahaye, by’umwihariko mu murwa mukuru Montevideo uzwi ku mbyino za tango n’imyidagaduro.
BBC Travel ishimangira ko ingendo zo mu 2026 zitazaba izo kwishimisha gusa, ahubwo bizagira uruhare mu kurengera ibidukikije no guteza imbere imibereho y’abaturage.