Umunyamakuru Angelibert Mutabaruka uzwi ku izina rya Angeli Mutabaruka yatangaje ko mugenzi we Kakooza Nkuliza Charles (KNC), usanzwe ari umukoresha we banakorana kuri Radio na TV1, yamufashije kwivuza amaso, bikamukora ku mutima bikomeye.
Uyu munyamakuru yabigarutseho mu kiganiro yagiranye na Igihe Sports TV, aho yavuze ko iyo nkunga yagiriwe na KNC iri mu bintu byatumye amwubaha cyane, ndetse bikaba byaratumye atigeze atekereza kumusiga ngo ajye gukorera ahandi.
Angeli Mutabaruka yasobanuye ko yigeze kurwara indwara y’amaso izwi nk’ishaza (cataracte mu ndimi z’amahanga), ari indwara ikomeye ishobora gutuma umuntu atabona neza ndetse ikanamutera guhuma burundu iyo itavuwe hakiri kare.
Ati: “Nari ndwaye ishaza, mbona ibintu bitangiye kujya mu rujijo, mbona ko bishobora kuntwara umwuga wanjye. KNC yaranyitayeho, anshakira uko nivuza, anyishyurira, bituma nongera kubona neza.”
Yakomeje avuga ko atazigera yibagirwa uwo mutima mwiza yagiriwe, kuko atari buri mukoresha ugira icyo kintu ku mukozi we, cyane cyane mu bihe by’uburwayi.
Angeli Mutabaruka yemeje ko iyo nkunga yagiriwe na KNC yamuhaye imbaraga zo gukomeza akazi ke k’itangazamakuru abikunze kandi abikora neza, anashimira ubuyobozi bwa Radio na TV1 ku bwitange bagaragaza mu kwita ku bakozi babo.
Yasoje avuga ko ari urugero rwiza rw’imikoranire ishingiye ku bwubahane, kwizerana no gufatanya, asaba n’abandi bakoresha kujya bitabira gufasha abakozi babo mu bihe bikomeye, kuko bibongerera icyizere n’umusaruro mu kazi.