Kuri uyu wa Gatanu, ku cyicaro cy’Ishyirahamwe ry’Umupira w’Amaguru ku Mugabane w’Uburayi mu Busuwisi habereye tombola y’icyiciro cya 1/8 mu marushanwa ya UEFA Champions League, igaragaza uko amakipe 16 asigaye azahura ahatanira itike ya 1/4.
Tombola yabereye i Nyon yitabiriwe n’abayobozi b’amakipe atandukanye, abatoza ndetse n’itangazamakuru mpuzamahanga. Yagaragaje imikino itoroshye, irimo izahanganisha ibihangange bisanzwe bihura kenshi muri iri rushanwa.
Mu mikino itegerejwe cyane, Real Madrid izacakirana na Manchester City, mu mukino uhuza amakipe amaze imyaka ashaka kwiharira iri rushanwa. Undi mukino ukomeye uzahuza Paris Saint-Germain na Chelsea.
Hari kandi umukino uzahuza Barcelona na Newcastle United, mu gihe Bayern Munich izahura na Atalanta.
Indi mikino izaba igizwe na:
Arsenal vs Bayer Leverkusen
Liverpool vs Galatasaray
Atlético de Madrid vs Tottenham Hotspur
Sporting CP vs Bodø/Glimt
Imikino ya 1/8 iteganyijwe gukinwa mu buryo bwa “home and away”, aho buri kipe izakira umukino umwe ikanajya gukinira ku kibuga cy’uwo bahanganye. Amakipe azatsinda ku giteranyo cy’ibitego mu mikino ibiri azahita akatisha itike ya 1/4.
Abasesenguzi b’umupira w’amaguru bavuga ko iri rushanwa rigeze mu cyiciro gikomeye, kuko amakipe menshi asigaye ari asanzwe afite amateka akomeye muri Champions League. Ibi bivuze ko buri mukino uzaba urimo igitutu n’ihangana rikomeye.
Icyiciro cya 1/8 gitegerejwe n’abakunzi b’umupira w’amaguru ku isi yose, aho buri kipe yifuza gukomeza urugendo rugana ku mukino wa nyuma no kwegukana igikombe gikomeye kurusha ibindi ku mugabane w’Uburayi.