Iyo umuntu arebye isi y’abaherwe bakomeye ku rwego mpuzamahanga, bisa n’aho byose byoroshye kandi byuzuyemo ubukire butagira iherezo. Ariko inyuma y’ayo mazina akomeye nka Mark Zuckerberg, Bill Gates cyangwa Elon Musk, hari ikintu kimwe kibahuza cyane kurusha impano cyangwa amahirwe: imyitwarire bafite ku bijyanye n’amafaranga.
Abantu benshi bifuza kugera ku rwego rwabo bafata urugendo rwabo nk’icyitegererezo, bakibaza niba ibanga ryabo riri mu gutinyuka, mu bwenge bw’ubucuruzi cyangwa mu mahirwe.
Nubwo ibisubizo bitandukanye, abasesenguzi bemeza ko imyitwarire y’igihe kirekire ari yo nkingi ikomeye y’ubukire burambye.
1. Gucunga umutungo neza no gushora amafaranga mu buryo bwatekerejweho
Abaherwe benshi ntibagarukira ku gutunga amafaranga gusa, ahubwo bamenya kuyacunga neza. Bashora mu byiciro bitandukanye by’ubucuruzi n’ishoramari, bagamije kwirinda gushyira umutungo wabo wose ahantu hamwe.
Iyi myitwarire ibafasha kugabanya ibyago no gukomeza kwagura umutungo wabo buhoro buhoro.
2. Kubaho mu rugero nubwo ufite byinshi
N’ubwo Mark Zuckerberg ari umwe mu bantu bakize cyane ku Isi, azwiho kubaho ubuzima bworoshye. Yirinda ibintu by’akataraboneka, akambara imyenda isanzwe kandi akoresha imodoka idahenze. Uko ni ko bimeze no kuri Warren Buffett, ugituye mu nzu yaguze mu myaka irenga 60 ishize.
Ibi bigaragaza ko kongera umutungo bitagomba guhita biganisha ku kwiyongera kw’ibyo umuntu akenera.
3. Guhora wiyubaka no kwiyungura ubumenyi
Bill Gates azwi cyane ku muco wo gusoma cyane no kwiga ubudahwema. Abandi bakire nka Oprah Winfrey na bo bashimangira akamaro ko kunoza ubumenyi, cyane cyane mu itumanaho no mu miyoborere. Gushora mu kwiga no kwiteza imbere ntibisaba amafaranga menshi, ariko bigira umusaruro munini ku buzima n’umutungo w’igihe kizaza.
4. Kwagura inyungu n’ibyo ushoramo
Elon Musk ntiyagarukiye ku modoka z’amashanyarazi gusa, ahubwo yaguriye ibikorwa bye mu byogajuru, itumanaho n’ikoranabuhanga rigezweho.
Jeff Bezos na we yashoye mu nzego zitandukanye zirimo ikoranabuhanga, ubuvuzi n’ibijyanye n’ikirere.
Icyigisho gikomeye aha ni uko gutandukanya ishoramari bigabanya igihombo kandi bikongera amahirwe yo kubona inyungu zihamye.
5. Gusubiza sosiyete ibyo yaguhaye
Abaherwe benshi bafata gutanga nk’inshingano. Mackenzie Scott na Azim Premji ni ingero z’abantu bahisemo gutanga igice kinini cy’umutungo wabo mu bikorwa by’ubugiraneza. Uretse gufasha abandi, ibi bigira uruhare mu gusiga umurage mwiza no gutanga umusanzu mu iterambere rusange.
Nubwo atari buri wese wagera ku rwego rw’ubukire bw’aba bantu, gukurikiza iyi myitwarire bishoboka kuri bose. Kubaho mu rugero, kwiga ubudahwema, gushora neza no kugira umutima wo gufasha abandi ni intambwe ikomeye ishobora guteza imbere imibereho n’umutekano w’amafaranga mu buzima bwa buri munsi.