Umutaliyani, Umwe mu nkingi zikomeye mu mateka y’imideli ku Isi, Valentino Garavani, wamamaye kubera amakanzu y’ijoro yihariye yambarwaga n’abagore b’ibyamamare ku rwego mpuzamahanga, yitabye Imana ku myaka 93, nk’uko byemejwe n’umuryango n’ishami rimufasha mu bikorwa by’ubugiraneza, Valentino Foundation.
Valentino, uzwi cyane ku izina rimwe gusa, yari icyitegererezo cy’ubwiza, ubuhanga n’ubugeni mu myambarire.
Mu myaka isaga 60 yamaze mu mwuga w’imideli, yubatse izina rikomeye ryambitse abamikazi, abakinnyi ba filime, n’ibyamamare bikomeye ku Isi, aho imyambaro ye yarangwaga n’isuku, ubwiza buhambaye n’uburyo idashira mu bihe.
Yavutse mu 1932 mu mujyi wa Voghera mu Butaliyani, Valentino yakuze afite inzozi zo kuba umunyamideli. Yize imideli mu Bufaransa mbere yo gutangiza inzu ye y’imideli i Roma mu mpera z’imyaka ya 1950. Aho ni ho yatangiriye urugendo rwatumye izina rye riba ikimenyabose ku rwego mpuzamahanga.
Valentino yamenyekanye cyane kubera ibara ritukura ryihariye ryiswe “Valentino Red”, ryabaye ikirango cy’inzu ye y’imideli. Amakanzu ye yambarwaga n’abagore b’ibyamamare barimo Jackie Kennedy Onassis, Elizabeth Taylor, Julia Roberts, Princess Diana n’abandi benshi, cyane cyane mu birori bikomeye nka Oscars na Cannes Film Festival.
Mu 2008, Valentino yasezeye ku mugaragaro umwuga wo gutunganya imideli, asiga inzu ye ikomeje gukorera ku izina yashinze. Nubwo yaretse akazi ka buri munsi, yakomeje kubahwa no gufatwa nk’umwe mu bahanga bahinduye isura y’imideli ku Isi.
Urupfu rwe rwatumye abakunzi b’imideli, abayikora n’ibyamamare hirya no hino ku Isi bagaragaza akababaro, bashimira uruhare rudasanzwe yagize mu guteza imbere ubuhanzi bw’imyambarire.
Valentino Garavani asize izina rikomeye n’umurage udashira mu mateka y’imideli ku Isi, aho azahora yibukwa nk’umugabo wahinduye imyenda iba ubuhanzi n’icyubahiro.