Ikigo cy’ikoranabuhanga cya Apple cyaguze sosiyete ikora porogaramu zitunganya amashusho yitwa MotionVFX, ikaba ifite icyicaro gikuru i Warsaw muri Poland.
MotionVFX yashinzwe mu 2009, imenyekana cyane mu gukora porogaramu zongerera imbaraga abatunganya amashusho bakoresha mudasobwa za Apple, by’umwihariko abakoresha Final Cut Pro na Adobe Premiere Pro.
Iyi sosiyete yubakiye izina ku guhanga no gutanga ibikoresho (plugins) byifashishwa mu gutunganya amashusho ku rwego rwo hejuru, harimo n’ingaruka zidasanzwe (visual effects) n’imitako ikoreshwa mu gutunganya amashusho y’umwuga.
Icyemezo cya Apple cyo kugura MotionVFX kigaragaza intambwe nshya mu gukomeza gushora imari mu guteza imbere urwego rwo gutunganya amashusho no guhanga ibikubiyemo (content creation).
Abasesenguzi bavuga ko bishobora kongera ubushobozi bwa Apple mu kunoza serivisi n’ibikoresho byayo byifashishwa mu gukora no gutunganya amashusho, ndetse bikarushaho guha agaciro abakoresha urubuga rwayo.
Nubwo amakuru arambuye ku gaciro k’iri gurwa atatangajwe, biteganyijwe ko ubumenyi n’ikoranabuhanga bya MotionVFX bizinjizwa mu bikorwa bya Apple, bishobora kuzamura ireme rya porogaramu zayo no koroshya akazi k’abatunganya amashusho ku isi hose.
Iri gurwa rikomeje kwerekana uburyo Apple ikomeje kwagura ibikorwa byayo binyuze mu kugura sosiyete zifite ubunararibonye mu bice by’ingenzi by’ikoranabuhanga.