Mu rukerera rwo kuri uyu wa Gatatu, ingabo za Leta ya Repubulika Iharanira Demokarasi ya Congo (RDC) zagabye igitero hifashishijwe indege zitagira abapilote (drone) mu mujyi wa Goma, igikorwa cyavuzwe ko cyari kigamije kwibasira bamwe mu bayobozi b’ihuriro rya AFC/M23.
Amakuru y’ibanze agaragaza ko icyo gitero cyahitanye abantu batatu, barimo umugore w’Umufaransakazi wakoreraga umuryango mpuzamahanga wita ku bana, UNICEF. Abandi bapfuye ntiharamenyekana imyirondoro yabo ku mugaragaro, mu gihe hari n’abakomerekeye muri icyo gitero.
Abaturage batuye mu bice byegereye ahabereye igitero bavuga ko bumvise urusaku rukomeye mu masaha ya kare y’igitondo, rukurikirwa n’iturika rikomeye ryateje ubwoba n’ikorwa ry’akajagari mu bice bimwe by’umujyi.
Amakuru aturuka mu nzego z’umutekano avuga ko igitero cyari kigamije abayobozi bakuru ba AFC/M23 bakekwagaho kuba bari mu nama yihariye muri umwe mu nyubako zo muri Goma. Icyakora, kugeza ubu nta makuru aratangazwa yemeza niba abo bayobozi bari bagambiriweho barishwe cyangwa bakomeretse.
Urupfu rw’umukozi wa UNICEF rwahise rutera impungenge mu miryango mpuzamahanga ikorera mu burasirazuba bwa RDC, aho ibikorwa by’ubutabazi bimaze igihe bikorerwa mu bihe bikomeye by’umutekano muke n’imirwano ihoraho hagati y’impande zihanganye.
Umuryango w’Abibumbye nturagira icyo utangaza ku mugaragaro ku bijyanye n’iki gitero, ariko amakuru y’ibanze avuga ko hatangiye iperereza rigamije kumenya uko umukozi wawo yaba yaraguyemo.
Iki gitero kibaye mu gihe umutekano mu Ntara ya Kivu y’Amajyaruguru ukomeje kuzamba, aho imirwano hagati y’ingabo za Leta ya RDC n’umutwe wa AFC/M23 ikomeje gutuma abaturage benshi bava mu byabo, bamwe bakambuka imipaka bahungira mu bihugu bituranyi.
Abasesenguzi bavuga ko ikoreshwa rya drone muri iyi mirwano rishobora gukomeza kongera ubukana bw’intambara, ndetse rikongera impungenge ku mutekano w’abasivili n’abakozi b’imiryango mpuzamahanga bakorera muri aka karere.