Abahanzi baririmba indirimbo zo kuramya no guhimbaza Imana, Vestine na Dorcas, bashyize hanze amashusho y’indirimbo yabo nshya bise “Itabaza”, ikubiyemo ubutumwa bukangurira abantu gukomeza kwiringira Imana no kwizera amasezerano yayo.
Iyi ndirimbo igaruka ku kuri ko Imana itandukanye n’abantu, kuko yo idahinduka kandi isohoza ibyo yasezeranyije igihe cyose kigeze. Ni ubutumwa buhumuriza abari mu bihe bikomeye, bubibutsa ko Imana itajya yibagirwa abo yasezeranyije.
Mu butumwa buyikubiyemo, Vestine na Dorcas bashimangira ko n’ubwo abantu bashobora gucika intege cyangwa ntibasohore ibyo bemeye, Imana yo ihora ari iyo kwizerwa kuko ibyo ivuze ibisohoza nk’uko yabisezeranyije.
Amashusho y’iyi ndirimbo agaragaza uburyo bw’ubuhanzi bwita ku butumwa burimo, afasha abayireba gusobanukirwa neza n’insanganyamatsiko yayo yo kwiringira Imana no kuyitabaza mu bihe byose.
“Itabaza” ni imwe mu ndirimbo zitezweho gukomeza gukora ku mitima y’abakunzi b’umuziki wa Gospel, cyane cyane abashaka ubutumwa bubahumuriza kandi bukabongerera ibyiringiro.
Amashusho y’iyi ndirimbo yamaze gushyirwa ku rubuga rwa YouTube rwa Vestine na Dorcas, aho ashobora kurebwa n’abakunzi babo ndetse n’abandi bose bakunda indirimbo zo kuramya no guhimbaza Imana.