Umugaba Mukuru w’Ingabo z’u Rwanda (RDF), Gen Mubarakh Muganga, yashimangiye ko Ingabo z’u Rwanda zifite inshingano zo kurinda abaturage n’ubusugire bw’igihugu, anavuga ko zizakomeza gukumirira kure icyaricyo cyose cyashobora guhungabanya umutekano w’Abanyarwanda.
Ibi yabigarutseho mu butumwa bwibanze ku mutekano w’igihugu n’uruhare rw’ingabo mu guharanira amahoro arambye, aho yagaragaje ko RDF ihora yiteguye guhangana n’ingaruka zose zishobora guturuka hanze cyangwa imbere mu gihugu zigamije guhungabanya ituze igihugu kimaze kugeraho.
Gen Muganga yavuze ko umutekano w’u Rwanda ari wo shingiro ry’iterambere igihugu kimaze kugeraho, ashimangira ko ingabo zifite inshingano zo gukomeza kuba maso no gukorana bya hafi n’izindi nzego z’umutekano kugira ngo hirindwe icyahungabanya ubuzima bw’abaturage.
Yagaragaje kandi ko RDF ikomeje kongerera ubushobozi abasirikare bayo binyuze mu myitozo itandukanye, gukoresha ikoranabuhanga rigezweho ndetse no gukomeza ubufatanye n’izindi ngabo zo mu karere no ku rwego mpuzamahanga, mu rwego rwo kurushaho kunoza akazi ko kurinda igihugu.
Uyu Muyobozi w’Ingabo yashimangiye ko ingamba zifatwa zose zishingira ku gukumira ibibazo bitaravuka, aho RDF ishyira imbere gukumira kurusha gutabara ikibazo cyamaze kuba.
Abasesenguzi mu by’umutekano bagaragaza ko ubu butumwa buje mu gihe akarere u Rwanda ruherereyemo gakomeje kugaragaramo ibibazo by’umutekano mucye, bigatuma ibihugu bitandukanye bikaza ingamba zo kwirinda ingaruka zishobora kubigeraho.
RDF ikomeje kugaragaza ko intego yayo nyamukuru ari ukurinda Abanyarwanda, ubusugire bw’igihugu ndetse no gutanga umusanzu mu bikorwa byo kubungabunga amahoro haba mu karere no ku rwego mpuzamahanga.