Umunyamakuru wa SK FM, Kazungu Clever, yanenze bikomeye urwego rw’imitoereze y’abatoza ba Rayon Sports nyuma y’uko iyi kipe inganyije na Gicumbi FC mu mukino wabaye mu ijoro ryakeye.
Abinyujije ku rubuga rwe rwa X (Twitter), Kazungu yavuze ko bidashoboka ko abatoza nka Romami Marcel na Sasha bananirwa gutsinda Gicumbi FC, bibaza niba koko bafite ubushobozi bwo kubona impamyabumenyi yo gutoza yo ku rwego rwa “License A”.
Yagize ati: “Niba Romami na Sasha badashoboye gutsinda Gicumbi FC, ubwo se License A bari gushaka ni iz’iki?” amagambo yagaragaje kutanyurwa n’imikinire ndetse n’imyitwarire y’aba batoza.
Rayon Sports ni imwe mu makipe akomeye mu Rwanda, bikaba byitezwe ko ihora itsinda amakipe mato cyangwa ayiri ku rwego ruri hasi. Kunganya na Gicumbi FC byafashwe nk’inkuru itunguranye ku bafana n’abasesenguzi ba ruhago.
Ibitekerezo bya Kazungu byahise bitera impaka ku mbuga nkoranyambaga, aho bamwe mu bafana bashyigikiye ibyo yavuze, mu gihe abandi bageragezaga gusobanura ko umupira w’amaguru ugira impinduka kandi ko kunganya bidahita bivuze intege nke z’abatoza.
Ibi bibaye mu gihe Rayon Sports iri mu rugendo rwo gushaka umusaruro mwiza muri shampiyona, aho buri mukino uba ufite agaciro kanini ku rugamba rwo guhatanira igikombe.