Perezida wa Repubulika y’u Rwanda, Paul Kagame, ari kumwe na Madamu Jeannette Kagame, bashyize indabo ku Rwibutso rwa Jenoside rwa Kigali ruherereye ku Gisozi, mu muhango wo gutangiza icyumweru cyo Kwibuka ku nshuro ya 32 Jenoside yakorewe Abatutsi mu 1994.
Uyu muhango witabiriwe n’abayobozi batandukanye mu nzego za Leta, abahagarariye imiryango mpuzamahanga, ndetse n’abaturage benshi, watangijwe hagamijwe guha icyubahiro inzirakarengane zirenga miliyoni imwe zishwe muri Jenoside yakorewe Abatutsi.
Nyuma yo gushyira indabo ku mva zishyinguyemo imibiri y’abazize Jenoside, Perezida Kagame na Madamu Jeannette Kagame banacanye Urumuri rw’Icyizere, ikimenyetso cy’ahazaza h’Abanyarwanda n’urugendo rwo kwiyubaka igihugu cyanyuze mu bihe bikomeye.
Uru rumuri ruzakomeza kwaka mu gihe cy’iminsi 100 yo Kwibuka, ihura n’igihe Jenoside yamaze mu 1994, rukaba rushushanya kwibuka, guha icyubahiro abazize Jenoside no gukomeza urugendo rwo kubaka ubumwe n’ubudaheranwa bw’Abanyarwanda.
Icyumweru cyo Kwibuka gitangirana n’itariki ya 7 Mata buri mwaka, umunsi Isi yose yemeje nk’Umunsi Mpuzamahanga wo Kwibuka Jenoside yakorewe Abatutsi, aho ibikorwa bitandukanye byo kwibuka, ibiganiro n’ubukangurambaga bwo kurwanya ingengabitekerezo ya Jenoside bitegurwa hirya no hino mu gihugu no mu mahanga.
Abayobozi bakomeje gusaba Abanyarwanda n’inshuti z’u Rwanda gukomeza gusigasira amateka nyayo ya Jenoside, kurwanya abayipfobya no guharanira ko ibyabaye bitazongera kubaho ukundi.