Ambasade y’u Rwanda i Doha mu gihugu cya Qatar yatangaje ko kuri uyu munsi iri gutanga serivisi hifashishijwe uburyo bw’ikoranabuhanga (online), mu rwego rwo kwirinda ibibazo by’umutekano bishobora kuvuka mu gace iherereyemo.
Ibi byatangajwe mu gihe abategetsi ba Qatar na bo batangaje ko abaturage batuye hafi ya Ambasade ya Amerika i Doha barimo kwimurwa by’agateganyo mu rwego rwo kwirinda ibishobora guhungabanya umutekano.
Ubuyobozi bwa Ambasade y’u Rwanda muri Qatar bwavuze ko iki cyemezo cyo gukorera kuri “online” kigamije gukomeza gutanga serivisi ku Banyarwanda batuye cyangwa bari muri iki gihugu, ariko hakirindwa ingaruka zaterwa n’icyahungabanya umutekano w’abagana ambasade.
Nubwo hatatangajwe impamvu nyamukuru yateye iki gikorwa cyo kwimura abaturage batuye hafi ya Ambasade ya Amerika i Doha, abayobozi b’iki gihugu bavuze ko ari igikorwa cy’agateganyo kigamije kwirinda no kurinda ubuzima bw’abaturage.
Iki cyemezo kije mu gihe mu bice bimwe by’Isi, by’umwihariko mu Burasirazuba bwo Hagati, hakomeje kugaragara umwuka utari mwiza w’umutekano bitewe n’ibibazo bya politiki n’intambara zimaze iminsi zivugwa muri aka karere.
Abanyarwanda baba muri Qatar basabwe gukomeza gukurikirana amakuru atangwa n’inzego z’ubuyobozi ndetse n’amatangazo atangwa na Ambasade y’u Rwanda muri Qatar, kugira ngo bakomeze gufata ingamba zikwiye zo kwirinda no kurinda umutekano wabo.