Leta Zunze Ubumwe za Amerika yatangaje icyemezo gikomeye cyo gufatira ibihano Ingabo z’u Rwanda (Rwanda Defence Force – RDF) ndetse n’Abayobozi bakuru bane b’igisirikare, ku mpamvu zijyanye n’uruhare bivugwa ko bafitanye mu gushyigikira umutwe w’abarwanyi wa M23 ukorera mu burasirazuba bwa Repubulika Iharanira Demokarasi ya Congo (DRC).
Abahanwe bose bashyizwe ku rutonde rw’ibihano, barimo abategetsi bakuru mu gisirikare, bashinjwa gutanga ubufasha bwa gisirikare, ibikoresho ndetse n’amabwiriza byatumye M23 ikomeza kurwana no kwigarurira uturere twinshi.
Mu itangazo ryasohowe n’ibiro by’umuyobozi ushinzwe ububanyi n’amahanga muri Amerika, ryatangajwe na US Treasury, abasirikare bane bahawe ibihano ni aba bakurikira:
1. Vincent Nyakarundi – Umugaba Mukuru w’Ingabo zirwanira ku butaka (Army Chief of Staff).
2. Ruki Karusisi – Jenerali Majoro, wari umuyobozi wa Diviziyo ya 5 ya RDF.
3. Mubarakh Muganga – umugaba mukuru w’ingabo z’u Rwanda.
4. Stanislas Gashugi – Commander w’Ingabo zidasanzwe (Special Operations Forces).
Abahanwe biteganijwe ko bazahura n’ingaruka zirimo guhagarikwa k’umutungo wabo uri muri Amerika, ndetse Abanyamerika ntibemerewe kugirana na bo ubucuruzi cyangwa indi mikoranire, haba ku giti cyabo cyangwa binyuze mu bigo bifitanye isano na bo.
Amerika ivuga ko iri ibi bihano bigamije gushyira igitutu ku Rwanda kugira ngo rukure ingabo zaryo mu ntambara yo muri DRC, kandi rwubahirize amasezerano y’amahoro ya Washington agamije guhagarika ibikorwa bya gisirikare no gushaka amahoro arambye mu karere.
Muri raporo za Washington, byagaragajwe ko RDF yafashije umutwe wa M23 mu bikorwa bya gisirikare, harimo gutanga imyitozo, inama, ibikoresho n’ubufasha ku butegetsi bwa gisirikare, ibintu byateje impagarara mu burasirazuba bwa Congo, ndetse bigakoma mu nkokora inzira z’amahoro.
Mu kiganiro n’abayobozi ba Leta ndetse n’abasesenguzi, u Rwanda rwatangaje ko rudashyigikiye ibyo ruvugwa ko rwakoze, ndetse rwemeza ko rutigeze rutanga ubufasha bwa gisirikare ku M23.
Mu itangazo ryashyizwe ahagaragara n’inzego z’umutekano, u Rwanda rwavuze ko ibi bihano bitarimo ukuri kandi bivuguruzanya n’imyanzuro y’ukuri y’ibiri kubera mu karere, ko kandi ari intambwe ishobora kubangamira ibiganiro by’amahoro n’ubufatanye bugamije umutekano mu karere.
Ibihano bya Leta Zunze Ubumwe za Amerika ku Gisirikare cy’u Rwanda n’abayobozi bakuru ba RDF ni umwanzuro udasanzwe mu mateka y’umubano w’ibihugu byombi.