Ikigo cy’Igihugu cy’Ibarurishamibare (NISR) cyatangaje imibare mishya igaragaza uko isoko ry’umurimo rihagaze mu Rwanda, harimo igipimo cy’ubushomeri n’umubare w’abantu batari mu isoko ry’umurimo.
Iyi mibare yashyizwe ahagaragara igamije gufasha inzego za Leta, abafata ibyemezo, abashoramari n’abaturage gusobanukirwa neza uko isoko ry’umurimo rihagaze, bityo hakanozwa gahunda zigamije guhanga imirimo no guteza imbere ubukungu.
Nk’uko Ikigo cy’ibarurishamibare cyibitangaza, raporo igaragaza umubare w’abafite akazi, abafite ubushobozi bwo gukora ariko badafite akazi, ndetse n’abatari mu isoko ry’umurimo, barimo abanyeshuri, abasezeye ku kazi, abafite ubumuga butuma badashobora gukora, n’abandi badafite cyangwa badashaka akazi muri icyo gihe.
Abasesenguzi bavuga ko imibare nk’iyi ari ingenzi mu gupima uko ubukungu bw’igihugu bukura no kureba niba gahunda zo guhanga imirimo zigera ku ntego zazo. Banagaragaza ko ari ishingiro mu gutegura politiki zigamije kongera amahirwe y’akazi, cyane cyane ku rubyiruko n’abagore.
Iki kigo gisaba abafatanyabikorwa gukomeza gukoresha iyi mibare mu igenamigambi no mu gutegura ingamba zafasha kongera umubare w’ababona akazi no kugabanya ubushomeri.
Raporo irambuye ikubiyemo ibisobanuro birambuye ku bipimo by’isoko ry’umurimo, uko bihagaze mu gihugu hose no mu byiciro bitandukanye by’abaturage, ikaba iboneka ku rubuga rw’ikigo cy`igihugu cy’ibarurishamibare.