Minisitiri w’Ububiligi ushinzwe abinjira n’abasohoka mu gihugu, Anneleen Van Bossuyt, yagiriye uruzinduko muri DR Congo agamije gutanga ubutumwa bukomeye ku bijyanye n’umubare w’abasaba ubuhungiro ukomeje kwiyongera cyane berekeza mu Bubiligi.
Mu magambo yasubiwemo n’itangazamakuru, uyu muyobozi yavuze ko imibare y’abasaba ubuhungiro igenda izamuka ku buryo “bukabije”, ashimangira ko bikwiye guhagarikwa kuko bidatanga umusaruro ku babigerageza. Yagize ati: “Ntacyo bimaze gukomeza kujya gusaba ubuhungiro, kuko abenshi babwimwa.”
Uru ruzinduko rwe muri DR Congo rubaye mu gihe hari impungenge mu bihugu by’i Burayi ku bijyanye n’iyongera ry’abimukira n’abasaba ubuhungiro baturuka mu bihugu bya Afurika, cyane cyane mu duce turimo ibibazo by’umutekano muke n’ubukungu.
Anneleen Van Bossuyt yagaragaje ko guverinoma y’Ububiligi iri gushyira imbaraga mu gukumira ubusabe budafite ishingiro, ndetse no gukomeza gusobanurira abaturage b’ibindi bihugu ko amahirwe yo guhabwa ubuhungiro ari make cyane ku basaba batujuje ibisabwa.
Yanasabye ubufatanye hagati y’ Ububiligi na Repubulika iharanira demokarasi ya Congo mu gukemura ibibazo bituma abaturage bahitamo gufata urugendo rushobora kubashyira mu kaga bajya gushaka ubuhungiro i Burayi.
Abasesenguzi bavuga ko uru ruzinduko rushobora gusobanurwa nk’uburyo bwo gukumira abashaka kwimukira i Burayi, cyane cyane mu gihe ibihugu byinshi by’i Burayi bikomeje gukaza amategeko ajyanye n’abimukira.
Nubwo ubutumwa bwe bwakiriwe mu buryo butandukanye, bamwe mu baturage bagaragaza ko impamvu nyamukuru zituma abantu basaba ubuhungiro zitakemurwa n’imbwirwaruhame gusa, ahubwo bisaba ingamba zifatika zo guteza imbere imibereho n’umutekano mu bihugu bakomokamo.