Umuryango uhuza ibihugu by’i Burayi na Amerika (NATO) watangaje ko wohereje muri Turkey uburyo bugezweho bwo kwirinda ibitero byo mu kirere buzwi nka Patriot Missile Defense System, mu gihe umutekano wo mu karere k’Uburasirazuba bwo Hagati ukomeje kuzamo umwuka mubi uterwa n’intambara zikomeje kuhavugwa.
Iki cyemezo cyafashwe nyuma y’uko ibihugu bigize NATO bigaragaje impungenge z’ingaruka zishobora guterwa n’intambara ikomeje gufata indi ntera mu bihugu byo muri ako karere, aho hari impungenge ko imirwano ishobora kwambuka imipaka ikagira ingaruka no ku bihugu bihana imbibi n’ahari imirwano.
Patriot Missile Defense System ni uburyo bw’ikoranabuhanga rihanitse bugamije gutahura no guhanura ibisasu bya misile bishobora guterwa mu kirere mbere y’uko bigera ku ntego yabyo. Ubu bwirinzi bufatwa nk’imwe mu ntwaro zikomeye NATO ikoresha mu kurinda ibihugu biyigize ibitero byo mu kirere.
Turkey, nk’igihugu kiri ku mupaka uhuza Uburayi n’Uburasirazuba bwo Hagati, imaze igihe igaragaza impungenge z’umutekano bitewe n’intambara n’imvururu zibera mu bihugu bituranye na cyo. Koherezwa kw’ubu bwirinzi bw’ikirere bivugwa ko bugamije kongera ubushobozi bw’iki gihugu mu guhangana n’ibishobora guhungabanya umutekano wacyo n’uw’akarere muri rusange.
Abasesenguzi mu bya politiki mpuzamahanga bavuga ko iki gikorwa cya NATO ari ikimenyetso cy’uko ibihugu by’i Burayi na Amerika bikomeje gukurikiranira hafi uko umutekano w’Uburasirazuba bwo Hagati uhagaze, cyane cyane mu gihe bigaragara ko amahirwe yo guhagarika intambara mu gihe cya vuba akiri make.
Nubwo NATO ivuga ko iri terambere rigamije gusa kwirinda no kurinda umutekano, hari abasesenguzi bagaragaza ko rishobora no kongera ubushyamirane mu karere, bitewe n’uko ibihugu bimwe bishobora kubifata nk’igikorwa cyo kwitegura intambara.
Mu gihe ibiganiro bya dipolomasi bikomeje gushakirwa umuti urambye w’amakimbirane ari mu karere, koherezwa kwa Patriot Missile Defense System muri Turkey bigaragaza ko amahanga akomeje gufata ingamba zo kwitegura ibishobora kuvuka mu gihe intambara yakomeza gukaza umurego.