Perezida w’u Burundi, Évariste Ndayishimiye, yihanganishije abaturage b’iki gihugu nyuma y’inkongi y’umuriro yibasiye ububiko bw’intwaro z’igisirikare buri mu gace ka Musaga mu murwa mukuru Bujumbura, mu ijoro ryo ku wa 31 Werurwe.
Iyi nkongi yateje impungenge mu baturage batuye hafi y’aho yabereye, aho humvikanye urusaku rukomeye rwaturukaga ku biturika by’intwaro zari zibitse muri ubwo bubiko. Abaturage benshi bagaragaje ko bagize ubwoba bwinshi bitewe n’urusaku n’urumuri rwinshi byagaragaraga mu kirere muri ayo masaha y’ijoro
Mu butumwa Perezida Ndayishimiye yanyujije ku mbuga nkoranyambaga, yagaragaje ko yifatanyije n’abaturage bagizweho ingaruka n’iyi nkongi, abasaba gukomeza gutuza no kwirinda amakuru adafitiwe gihamya ashobora guteza urujijo. Yanasabye Imana gukomeza kurinda u Burundi no kubuha amahoro n’umutekano birambye.
Inzego z’umutekano zahise zitangira ibikorwa byo kuzimya umuriro no kugenzura umutekano w’ako gace, mu gihe hatangiye iperereza rigamije kumenya icyateye iyi nkongi n’ingano y’ibyangiritse. Abaturage batuye hafi y’aho byabereye basabwe gukurikiza amabwiriza y’inzego zibishinzwe kugira ngo hirindwe icyateza izindi ngaruka.
Nubwo hataratangazwa imibare ntakuka y’ibyangiritse cyangwa ababa bagizweho ingaruka, ubuyobozi bw’u Burundi bwatangaje ko buri gukurikirana iki kibazo hafi kugira ngo harebwe uburyo hafatwa ingamba zo gukumira ko ibyabaye byazongera kubaho.
Iyi nkongi ibaye mu gihe igihugu gikomeje gushyira imbaraga mu gushimangira umutekano n’ituze rusange, aho abayobozi bakomeje gusaba abaturage gukomeza ubufatanye mu kubungabunga amahoro n’umutekano by’igihugu.