Mu mibanire y’abakundana, hari ibikorwa benshi bafata nk’ibisanzwe cyangwa ibimenyetso by’urukundo. Nyamara, iyo bidakozwe habanje kubaho ubwumvikane n’ubushake bwa buri ruhande, bishobora gufatwa nk’ihohotera rishingiye ku gitsina.
Dore ibintu bitanu bishobora kugushyira mu bibazo by’amategeko igihe bidakozwe mu bwubahane no kubaha uburenganzira bw’undi.
1. Gusoma umuntu ku ngufu
Nubwo gusomana ari kimwe mu bimenyetso by’urukundo, gusoma umuntu atabishaka cyangwa yarabyanze bishobora gufatwa nk’ihohotera rishingiye ku gitsina.
2. Gukorakora ibice by’ibanga utabiherewe uburenganzira
Gukora ku mubiri w’undi, cyane cyane ku bice by’ibanga, nta bwumvikane bwabanje kubaho, bishobora gutuma uregwa ihohotera rishingiye ku gitsina n’iyo mwaba mukundana.
3. Kohereza amafoto cyangwa ubutumwa bw’imibonano mpuzabitsina umuntu atabishaka
Kohereza amafoto, amashusho cyangwa ubutumwa bufite imiterere y’imibonano mpuzabitsina ku muntu utabibasabye cyangwa utabyifuza bishobora gufatwa nk’ihohotera.
4. Guhatiriza uwo mukundana gukora ibikorwa by’imibonano mpuzabitsina
Gukoresha igitutu, iterabwoba cyangwa amayeri kugira ngo umuntu yemere ibikorwa by’imibonano mpuzabitsina adashaka ni kimwe mu bikorwa bishobora gukurikiranwa n’amategeko.
5. Gufata cyangwa gusakaza amafoto n’amashusho yihariye nta ruhushya
Gufata amafoto cyangwa amashusho yihariye y’uwo mukundana, cyangwa kuyasangiza abandi atabiguhereye uburenganzira, bishobora kukugeza imbere y’ubutabera.
Urukundo nyarwo rushingira ku bwubahane, ubwumvikane no kubaha amahitamo ya buri muntu. Kuba mukundana ntibivanaho uburenganzira bwa buri wese bwo kwemera cyangwa kwanga igikorwa icyo ari cyo cyose kimukorerwa.